Konferensııada qalalyq bilim basqarmasynyń basshysy Janat Arysbekqyzynyń 2019-2020 oqý jylynda atqarylǵan jumystary men aldaǵy mindetter týraly baıandama jasady. Onyń aıtýynsha, epıdemıologııalyq jaǵdaıǵa baılanysty jańa oqý jylynda 14 940 bastaýysh synyp oqýshysy úshin ata-analardyń ótinishi negizinde qatań sanıtarlyq talaptardy saqtaı otyryp, 996 kezekshi synyp ashylady. Olar tek bir kabınette bir muǵalimmen ǵana oqıdy, úzilister ártúrli ýaqytta, synyptaǵy balalar sany 15-ten aspaıtyn bolady eken.
Búginde mektepter «Bilim Iand - Onlinemektep.orq» ınternet platformasynda qashyqtan oqytýǵa tolyǵymen daıyn. Kompanııa tarapynan Shymkent qalasyna server ornatý «Qazaqtelekom» AQ arqyly qamtamasyz etilýde.
Sonymen qatar, oqýshylardyń qaýipsizdigi basa nazarǵa alynǵan qaladaǵy 36 mektepke ishki ájethanalar ornatylyp, 136 mektep 100 paıyz beınebaqylaý kamerasymen qamtamasyz etildi.
Keńes barysynda shahar basshysy Murat Dúısenbekuly jyl saıyn jańa oqý jyly aldynda ótkiziletin tamyz keńesi ustazdar úshin mańyzdy jıyn ekenin atap ótti.
«Elimizde alǵashqy ret balalar jańa oqý jylyn qashyqtan oqýmen bastaýda. Qashyqtan oqý barysynda kóptegen qıynshylyqtarǵa qaramaı ustazdarymyz únemi izdene otyryp, birligimen, belsendiligimen, jaýapkershiligimen qala abyroıyn asqaqtata bildi. Birlese atqarǵan eńbekterińiz úshin barlyqtaryńyzǵa alǵysymdy bildirgim keledi»,- dedi qala ákimi.
Sondaı-aq, bilim salasynyń basshylaryna jańa oqý jylynda barlyq bilim berý uıymdarynda sanıtarlyq talaptardyń saqtalýyn, sybaılas jemqorlyq táýekelderi oryn alatyn barlyq qyzmetti sıfrlandyrýdy, tehnıkalyq jáne kásiptik bilim berý uıymdarynda dýaldy oqytýdy jáne «Jas maman» jobasy boıynsha jumystardy sapaly júrgizýdi tapsyrdy.